اشتغالات فى الشات

دلوقتى النت اصبح جزء لا يتجزأ من حياتنا والحكاية اللى حاحكيها بتحصل كل خمس دقايق ويمكن اقل كمان مش حطول عليكم
البداية بنت دخلت شات رووم واتعرفت على شاب فاضى طبعا وعايز يسلى وقته ومش شرط خالص يكون عاطل ممكن يكون بيشتغل بس اشتغالات البنات بتجرى فى دمه زى مااشتغالات الولاد بتجرى فى دمها ومحدش شايف حد حنفرض مثلا ان البنت اسمها منى والولد اسمه احمد علشان يبقى فيلم عربى
احمد : ممكن اتعرف على صاحبة الاسم الحلو ده ؟
منى : طبعا
وطبعا تجر طبعا واتعودوا يكلموا بعض كل يوم وبعد كده الشات مش كفاية لا ده كمان تليفون والاشتغالة قلبت حب مرة و لازم طبعا يتقابلوا علشان يشوفوا حيعملوا ايه فى الحياة الوردية وديه تفاصيل المكالمة اللى قبل المقابلة بيوم
احمد : الو ياحبيبتى عاملة ايه وحشتنى كتير
منى : انت اكتر ياحياتى حبيبى عايزة اقولك حاجة بسيطة انا كدبت عليك فيها بس والله قبل مااحبك
احمد : قولى ياحبيبتى انا مقدر موقفك
منى : حبيبى انا اسمى الحقيقى رانيا وساكنة فى امبابة مش المهندسين
احمد : ولا يهمك ياحياتى انا اللى يهمنى الانسانة اللى حبيتها
منى: حبيبى الصورة اللى انت شفتها دية مش بتاعتى ديه صورة لاقيتها على النت فى الحقيقة انا لونى خمرى غامق
احمد: ولا يهمك ياحياتى المهم الروح اللى حبيتها
منى : انا مش بشتغل سكرتيرة تنفذية فى شركة سياحة انا بشتغل كاشيرة فى محل ملابس
احمد : انا بحبك واكيد حقدر كفاحك
منى : انا بحبك اوى يا احمد وصدقنى انا كدبت عليك علشان اشتغالات النت الكتير اصل بصراحة مش بحب الاشتغالات
احمد : انا مسامحك ياحياتى بس فى حاجة انا خبيتها عليكى وياريت تسامحينى
منى : قول بسرعة ماتقلقنيش ؟
احمد : انا شعرى خفيف وبحلقه على الزيرو بس قولتلك انى شعرى تقيل علشان انتى قولتى بتحبى الولد اللى شعره تقيل
منى : وليه كدبت عليا انا مش بحب الكدب ياخاين اعتبر كل اللى بينا انتهى
احمد : يامنى قصدى يارانيا
منى : ارجوك امسح رقمى انت برا حياتى من دلوقتى باى .